فضفضة..اعجبتني

نفسي أقول
*-*-*-*-*-
ياجماعه حسني جاي سابغ شعره علي نفقة الدولة
وفريد الديب عاوز طبيب تاني ليه بدل الأماني وبرضه علي نفقة الدولة
و 8 الاف عسكري وضابط بيحرسوا المحكمة وبرضه علي نفقة الدولة
وحسني نايم علي سرير في القفص مع العلم ان في ناس كانت بتموت واقفة في القفص والسرير علي نفقة الدولة؛
وجاي في هليكوبتر .. تمنها وبنزينها علي حساب مين ؟
ومش هو قال ان مستشفي مزرعة طررة 5 نجوم ... طيب ليه مش عاوز يدخلها ؟!! وقاعد علي نفقة الدولة في شرم الشيخ ؟

ولو هيكمل علاجه يبقي علي حسابه مش حسابنا .. ليه مدخلش مستشفي الحميات او مثلاً ابوالريش أو المستعصية أو مستشفي النصر .... مش دي الحاجات اللي عملها لينا ؟!!

ومحاميهم بيطلبوا التبرئة ليهم وهم بينكروا افعالهم
فأنا بقولهم والكلام لي ولأختي المحامية يعني كلام موثق قانونياً
إنه لو هيتحكم علي واحد في سنه هيبقي بانه يتسجن في المستشفي ده أولاً وده لأي حد في سنه لأنه ميت ميت ومش هيستحمل
ده غير ان لكل واحد فيهم قضايا منفصلة غير دي يعني هيلبسوا في الحيطه برضه
ده غير ان فريد الديب لو ضم الملف الطبي هيؤدي برضه لنفس النتيجة اللي فاتت
وكمان هما بيطالبوا بإن القضية تبقي جنحة مش جناية
كويس
لأن القاضي ممكن يرفض الطلب ده ويشوف انها جناية وبالتالي تبقي من اختصاصه ومحدش يقدر يعارض

وكمان المهرج اللي عاوز يخليها ضرب أفضي إلي موت بدلاً من القتل العمد ( وه والدكتور سيد عتيق) ده بيهرج لأن القتل كان مسبق وكمان التعمد كان واضح لاستخدام اسلحة ... والترصد لوجود القتلة في نفس مكان تواجد المقتولين يعني مش الصدفة اللي هتجيب الشرطة تقتل ولاالعربية تخبط علشان يبقي ضرب افضي إلي موت .!!! ثم بالمنطق والقانون هل استخدم القتلة في قتل المتظاهرين طريقة الضرب بالأقلام أو بالشلوت مثلاً أو عصاية استيك جيلاتي مثلاً والحاجه دي مكنش من شأنها القتل لكنها قتلت ؟
لو كان كده هيبقي ضرب افضي إلي موت لكنهم استخدموا سكاكين ومسدسات ورشاشات وعربيات مسرعة .. دي حاجت للطبطبه ولاللضرب ولاللموت ؟ ومين ده اللي بيضرب حد بمسدس وميموتش ؟ ولاهيطلع المتظاهرين اخطأوا هم لما ماتوا من مجرد الضرب ؟! ويبقي الخطأ في القتل انهم ماتوا مش إنهم اتضربوا !!!

وكمان فكرة ان اهالي الشهداء بيقولوا ان مبارك قتل المتظاهرين مع ضباط بأوامر مباشرة منه ... فالمحامي بتاعه بيقول ان اسماء الضباط مش معروفة وهيبقي كده قاتل مع مجهول وان ده اتهام غريب... فكلامه اغرب لأن ابسط تحقيق هيجيب اسماء من كانوا في الميدان من الضباط والقتلة وكمان ده مبينفيش ان دول كانوا من الشرطة وان وزير الداخلية بتاعه متصرفش من دماغه بل بأوامره يعني هو مدان مع حبيب العادلي مش مع مجهول فيبقي مصيره مرتبط بالعادلي مش بالقاتل المجهول .. صح ولاإيه ؟

ويكفي مبارك فخراً أن محاميه هو (فريد الديب) محامي الجاسوس الاسرائيلي "عزام عزام" فأظن دي احسن خاتمة لحياة مبارك .... وزي مافريد الديب كان السبب في نطق القاضي بحكم الاعدام علي (هشام طلعت مصطفي) ثم قلله ( د/محمد أبوشقة) إلي 15 سنه .. فنرجو من الله نفس الحكم أو مايساويه لحسني مبارك .

وعليهم جميعاً من الله مايستحقونه

وحكم السماء قد قُضي عند الله وأنا ليست ثقتي في أحد قدر ثقتي في الله ولو شاء الله لهم ان ينجو في الدنيا فلن ينجو في الأخرة ولاهذا خيراً لهم لأن الله سيدخر لهم العذاب بالكامل والحساب بالكامل في الأخرة

قال تعالي في سورة إبراهيم
(ولاتحسبن الله غافلاً عما يعمل الظالمون، إنما يؤخرهم ليوم تشخص فيه الأبصار. مهطعين مقنعي رؤوسهم، لايرتد إليهم طرفهم، وأفئدتهم هواء)

وقال ايضاً في سورة الزخرف
(ولولا أن يكون الناس أمة واحدة لجعلنا لمن يكفر بالرحمن لبيوتهم سقفا من فضة ومعارج عليها يظهرون ولبيوتهم أبوابا وسررا عليها يتكئون وزخرفا وإن كل ذلك لما متاع الحياة الدنيا والآخرة عند ربك للمتقين )

يامبارك ألم يستيقظ ضميرك وأنت ملقي في القفص ؟
ياابنائه ... ماحالكم وأبوكم ملقي مسجاً علي سريره في القفص يشاهده العالم ( حوالي 9 مليار ساكن حول العالم يتابعون) ؟
بالله عليكم ممكن حد فيكم يتمني لأبوه نفس المنظر ده ؟

نفعتكم الفلوس ؟

الناس دي ضميرها مش هيصحي أبداً ... قلوبهم مقفولة بأقفال .

قال أحد الحكماء
(إن من يستطيع أن يكذب وأنت عينك في عينه فهم أقوام لهم الأرض بمن عليها)

فهؤلاء يكذبون أمام العالم كله بلاحرج .. ويقولون ( نحن ننكر كل الاتهامات)

وأبوهم " شيخ كاذب "

أنا كده فضفضت لأني كنت مخنوق ... ومعلش لو طولت عليكم .

اللهم عدلك ياعدل .

بقلم:

Mr-Mohamed Gaber Yusuf

التسميات : مقالات صحفية